كل واحد يتعلم من طيحته

[مشعل القويعي]

شباب ..

حطيت هذا الموضوع ليتمكن كل شخص من سرد قصته لما طاح من الدباب لينتبه منها غيره ولا يكرروها واذا استطاع ذكر ماذا يفترض ان يفعل لكي يتفادى هذه الطيحة إن وجد .لذا يرجى الجدية في الكتابة

وراح أبدأ بنفسي وياريت تسرد قصتك بنفس النمط قصة ثم اصابات ثم تلفيات ثم نصائح

كانت عام 2002 وكان معي هوندا CBR900RR كنت في طريق الخدمة وطالع للسريع في طريق الملك عبدالله وكان أمامي سيارة يبي يطلع للسريع هو بعد ولكني فوجئت أنة ربط فرامل قوية عند عنق المخرج ليشاهد بعض الشباب وهم يستعرضون على الطريق السريع وعندها ضربت بريك أمامي بشكل قوي مع لفة الدركسون يسار على بالي اني ابهدي وابتجاوزه من اليسار لكن الدباب زلق على جنبه اليسار وزحف حوالي مترين من جنب السيارة .

إصابات :

جرح سطحي في الساعد الأيسر .
جرح سطحي في الركبة اليسار .

تلفيات :

الجانب الأيسر بالكامل للدباب .
سناد الرجل الأيسر انعفط .
عصا الجير مالت.

نصائح :

لا تسير خلف السيارة مباشرة بل حاول انك تسير خلفها يمين أو خلفها يسار لكي تتمكن من المراوغة في حالة البريك المفاجئ من السيارة .

[ahmad1000]

شكرا يا مشعل على هالموضوع الرائع والي يدل على حرصك على الاخرين



كانت قبل ست شهور تقريبا وكنت في شارع التحليه ماسك المسار الايمين وكانت الطريق زحمه فا قلت خليني اطلع الرصيف الصغير الي على جنب الطريق بمجرد ما فكرت اني الف على الرصيف طحت انا وهو والحمد لله ما كنت مسرع ولا كان علوم كان انا وهو تحت واحده من السيارات ....


الاصابات

الحمد لله لا توجد اصابات ..........


التلفيات

1- مخوش بسيطه في الفيبر

2- الاشارة الجانبيه انكسرت

3- دعسة الفرامل مالت


النصائح

انصحكم انه باخذ الرصيف وجها لوجه ووعدم محاذاته واخذه على جنب.

[Mazen]

تسلم يا كابتن على هذا الموضوع المهم

أنا صار لي الحادث بدبي أخر ليلة في دبي بايك ويك يعني بالضبط قبل 53 يوم من كتابة هذه المشاركة. المهم إلي صار أني جيت أرفع بسرعة في مكان غير صالح للأستعراض أو حتى المشي فيه بالدباب عشان أرضيته قرميد ولما جيت أخفف ما ساعدت الأرضية على عشان أنها زلقة وفيها تراب وزلقت فرميت الدباب على اليسار وأنا على اليمين ولكن الدباب ضرب رصيف حوض الشجر وأرتد طاير فوقي وبالأخص رجليني.

الإصابات:
كسر مضاعف بالساق اليسار مع تركيب شريحة معدنية على العظم لمدة سنتين.
خدوش أحتكاك بالأرض في الركبتين والكوعين والحوض اليمين.

التلفيات:
وجه الدباب (تبديل)
المساعدات (تبديل)
اليدات وعصي البريك والكالتش (تبديل)
تصليح الفيابر
وبعض القطع للتبديل.

النصائح:
1. أترك عنك الزعاطة أو لا تسوق دباب.
2. إذا حبيت تسوي شيئ وهو جديد عليك تأكد من الطريق وسلامة الأرضية والدباب.
3. لا تاخذك العزة بنفسك ولا تتحدى الدباب وتذكر دايم أنه غدار ولازم تتعامل معه على هذا الأساس.
4. أحذر من تصرفاتك قبل تصرفا الآخرين.
5. ألبس كل لوازم السلامة ولو كان الجو نار مو بس حر (خوذة - جاكيت أو بروتكتر صيفي - كسارات للركبتين والساق).

"وكفى الله المؤمنين شر القتال" :D

[nobody]

السلام عليكم
يمكن اعلب الشباب يعرف كيف طحت ولكن لا يمنع سردها من جديد:
طلعت بالحالي اتحدى المنعطفات في العمارية ( توني جديد على الدباب ) المهم انغريت من تماسك الدباب ( ما شاء الله ) وصرت ازيد السرعة مع كل منعطف لين صرت آخذ بعض لمنعطفات على 150 واحياناً 160، المهم بعد 12 كلم من الدوار جاني ذاك المنعطف مثل اي منعطف لكن كنت امشي 220 وعطها فرامل واشوى نزلت السرعة 130 وأخذت المنعطف وانا مرتبك ما دريت إلا المنعطف يعتدل شوي ثم ينعطف من جديد قام اخوكم وارتبكت قمت تشهدت ونزلت رجلي الثنتين على الزفلت ( توقعت إني ابي اوقف الدباب برجلي متعود على السياكل ) . لقيت الدباب يتجه للوح خشب مكتوب عليه مزرعة للبيع، قمت وتركت الدباب وسلمت امري إلى الله ( والله يا جماعة إني اشوف صورة ولدي وزوجتي قدامي ) ضرب طرف الكفر الأمامي في اللوحة المثبته صح وانا إلي أطير حول 30 متر ( الحمد لله كانت علي خوذة والجكيت توه واصل بنطلون جنز وبوت تكرمون ) امهم وانا طاير طحت على كتفي اليسار وبدأت الدحرجة والمشكلة الدباب كانت طايح وراي وقاعد يلاحقني، وقف الدباب بعد 15 متر وانا استمرت اتقلب ربك ستر علي مريت من بين عامود كهرب وحاجز حديدي وطحت في حفره، قمت وقفت تنفست اتجهت للدباب لقيت خط زيت طويل قمت ورفعت الدباب ووقفته على الستاند، جو المزارعين يساعدوني ما قصروا عطوني مويه وشاهي ( المصيبه إني لقيت بنطلون الجنز واصل لرجلي لكن كانت علي بجامه فسترت الخافي ) تورطت ما ادري وش اسوي؟ ادق على المرور ولا إيش، قمت ودقيت على سامي عدة وهو ما قصر دق على الشباب وجو وأخذوني.

الإصابات:
رضوض في الجسم كامل، تلون جسمي لأسبوعين والركب تقشرت وصارت تصب دم. ولله الحمد

التلفيات:
الفيابر أغلبها تكسرت، انكسر النور الأمامي مالت المساعدات الأمامية التانكي انعفط، وطاية السائق اليسار انكسرت، انكسر الجنط الأمامي انكسر الدينمو. واللسته تطول
عرض علي واحد انه يشتريه تشيلح لكن السعر ما كان مناسب وانا اعتقدت إني اقدر اصلحه بقيمه أفضل وابيعه بسعر طيب، لكن يوم جبت القطع جديدة وأضفت بعض الإكسسورات المهمة للدباب وبدينا نركب فيه لقينا الشاص منعفط haaa haaa haaa يوم بغيت انهبل ولكن مكره اخاك واجيب شاص جديد ، قلت اول ما يشتغل ابي اسوقه اسبوع وابيعه لأني ماني متوقع انه يكون متماسك أو مريح أو سريع أو على الأقل يرجع مثل أول على الأقل، ولكن ولله الحمد له الآن شهرين معي ومستانس منه مرة ولا أفكر ابيعه ولله الحمد.

النصائح:
الحرص على الخوذ الممتازة ( اشتر افضل خوذة تقدر تشتريها.
اشتر افضل جكيت تقدر تشتريه واحرص على نوعية الدروع.
اشتر بنطلون جلد إذا كنت تقدر. ( لازم يكون مخصص للدبابات )
إذا كانت الكنادر فوق الكعب فهذا ممتاز وبدأت تجي في الأسواق كنادر تهويتها جيدة واسعارها مناسبة مقابل فائدتها.
احرص على درع للظهر.
مهما دفعت مبالغ في اللبس إلي يحميك فهذا قليل مقابل السلامة.
لا تتعامل مع الشوارع على أنها حلبه.

بالتوفيق وانتبهو لانفسكم
http://www.jkdman.com/images/moto/disalvo3s.jpg

[YAZ_R6]

انا حوادثي كثيره ابدا باقرب شي كنا في الأمارات وكنت ابغى استعرض في ساحه صغيره نفس الساحه حقت مازن المهم انا ماحسبتها صح ولا الأرض مايله وغلطت اني حاولت اسوي الحركه والقير بالثالث بدل السادس هدى الدباب بسرعه فقدت توزني وتمايل الدباب ونطيت من عليه والحمد الله وقعت على رجولي وطحت طيحه بسيطه

الأصابات خدش بسيط في الركبه والمؤخره ورضه في الركبه

الخساير كسر في الفيبر الخلغي بس هذا ولله الحمد

النصائح اذا انت متدرب على حركه بشكل معين وبطريقه معينه لا تحاول طرق ماتعوتد عليها


والحمد الله طلعت سليمه

[زاحف]

الحمدلله على سلامة الجميع..
بداية أحيي فيكم الشجاعة الكبيرة الي فيكم لأنة توجد عقدة عند بعض الناس المعقدين انة لازم ما يعلم احد عن طيحاتة ابد ولا كأنه طاح(مايدري انة راح يستفيد)..
المهم..
حادثي أو حويدثي هو اني كنت مستعرض وراقي فوق التانكي وكان وقت طلعة الطلاب من مدارسهم ..مهيب هذي هي المشكلة لكن المشكلة هي اني كنت مقبل على منطقة تكون فيها السيارات الي على اليمين تبي تروح يسار واللي على اليسار تبي تروح يميين(حلها) وخويكم ماااشي الا وذاك اللاند كروزر اللي طالع من اليمين لليسار وخويكم ماااشي يوم شفته ملزم انه بيروح يسار(ناوي احده احسب معي سيارة) لفيت يسار لفه أليمة وفرامل أمامي...........وطبعاً عارفين تتمة القصة..أنا يوم شفت الدباب قرر انه ينام على جنبه الأيسر وأتعوذ من بليس وأقول لااااا مالك الا جنبك الأيمن ...ويوم شفته موجه للأرض على جنبه الأيمن وأحط رجلي اليمين على الأرض وانقز من الدباب وأتدحرج وهو زحف شوي و وقف لكن المشكلة مهيب هذي المشكلة اني أول ما طحت قعدت أهوش راعي اللاند (ماتشوف ...خير انشالله) هو نزل بس ونتطاق على خفيف وجا خويه وفكنا الله يجزاه خير<<<<بغا ينجلد!! والمشكلة الثانية اني طايح عند شارع بيتنا وأخاف احد يشوفني وأصير سالفة بين ألسنة الناس الي تستهزي فيك..وأنادي راعي اللاند أقول له طيب على الأقل عاوني وتعال ارفعه معي ..عطاني نظره وفهمتها على طوول قمت ناديت مصري راكب دينا وما قصر رفعة معي وبغا يقلبة على الجنب الثاني ورحت للبيت (دفاً) على الأقدام..
الأخطاء الي صارت:
- مستعرض في منطقة خطرة وفي وقت مزدحم.
- ما لبست خوذه ولا جاكيت.
- لفيت بقوة لليسار مع فرامل أمامي.
- شين وقوي عين(مخطي على الجيب وقاعد انفخ).
الأضرار في الدباب :
- مخوش في فيبر يمين مع كسور(ملفيه كسارات!)
- عصا فرامل خلفي أنعفطت.
الأضرار الجسدية:
ولله الحمد ما جاني شي لأني كنت امشي 30-40
--أهم شي ياشباب لحد ياخذ الشوارع حلبة للإستعراض لأن الغالب منها ما يصلح للشي هذا وان كنت ملزم ومستعرض مستعرض رح شف لك شارع فاضي وسو الي تبي--
طولت عيكم(صار حادث ديانا مهوب طيحة دباب)!!!

حافظكم ربي..::saudi::

[AbuNassir]

شكرا على الموضوع الجيد وخصوصا اني صارلي حادث بسيط قبل يومين
ببساطة كنت طالع من الاستراحة بالدمام وراجع بيتنا في حالي مشيت في شارع خطين كل شي اوكي طلعت من اللفة ومشيت بسرعة بسيطة كان قدامي سيارتين الاخ الي على اليمين يعتبر عاكس المهم ماني عارف كيف صار كلها 5 ثواني الاخ فكر يلف يساره وغير رايه مدري يفحط مدري وش قصة اهله الا قدامي وجه بوجه انا غلطتي اسرعت شوي 60 او يمكن 50 منيب كنت مسرع مررة الا كان صار الموقف افضع فصار وجه بوجه ماليقت الا اني رايح اقصى اليمين وشوي الا حذف الدباب الكل يقول اني كنت ماسك بريك قدام بس بصراحة ماذكر انا لا شعوريا لمن رحت اقصى اليمين حاس فيني الدباب

الاصابات
يدي اليمين الي اساسا تعورني جاءها جروح بالكوع وشوي مخشات بسيطة وبالنسبة لرجلي الفخذ الايمين انجرح وفي عندي جرح برجلي اليسار من الدباب اظن وكتفي لازال يعورني فيه رضة
بالنسبة للدباب الفيابر تمخشت بس والاصابع

النصائخ
لا تمشي بطريق مزدوج قد ماتقدر
اي لفة خفف عندها وخصوصا لمن تشوف سيارة قدامك او خلفك تراهم اغشم من البهم ولا يهمهم الدباب يحسونه لا شي
استعمال الخوذة وصدقوني بعد الله انقذتني سمعت صوت خبطة راسي بالارض بس الله حماني ونويتة اشتري الجاكيت من جد نحتاجه
كل العالم الي حولك غشم ومايعرفون اداب القيادة خل المفهوم هذا في راسك وخلك حذر لان من جد في عالم مايخافون الله يحسبون الدباب ذبابة خل نطيرها
اليوم طلعت ومن جد الشرقية ناس كثير يتعاملون مع الدباب على انه شي تافه حده سابقه انطل عليه كل شي تتخيلونه وفي ناس يتحرشون فيك حاول تتمالك اعصابك وتصرفهم بطريقة لبقة عشان ما يحدونك ويخربون عليك حياتك الدباب يتعوض بس انت ماتعوض

[abosharaf]

السلام عليكم:saudi:
مشكورين كلكم على النصايح
اما بالنسبه لي فصار لي حادث وانا رافع طبعا بسرعه وانا ماشي 100 تقريبا بدباب اربع كفرات ملغمz400 استعرض بمكان مو للاستعراض اصلا المهم انا كنت متاكد ان الشارع فاضي قدامي اتفاجئت بسياره واقفه قدامي بالعرض من وين جا ما ادري
الاخ لمن شافني رافع ارتبك ووقف مكانه بيني وبينه تقريبا 100 متر لكن انا ماشي بسرعة 100 تقريبا نزلت الدباب دعست فرامل خلفي مع تغيير نمر ولمسات خفيفه امامي تفاديت السياره بالعرض يعني انقلبت على الجهه اليسارغصبا عني مو برضاي وانقلب الدباب فوقي ووصلت عند السياره بيني وبينها تقريبا متر فقط طبع اسمع صوت الازفلت في الخوذه.. طبعا قمت وانا ما اقدر احرك يدي اليسار وقلبت الدباب لوضعه الطبيعي من الزعل والقهر اني اصبت وتحركت على البيت ومنها على المستشفى والحمد لله على كل حال
الأصابات:
كسر في اليد اليسار مع خدوش في اليد والاكواع والركبه اليسار بنكهت الاسفلت طبع وانت تعرفون طعم الاسفلت
التلفيات :
لا تلفيات في الدباب لكن فيني انا بس
النصائح:

السلامه اولا
اهم شي خوذه +جاكيت +كسارات للركب والساق
وخلو عنكم الترفيع في اي مكان أختر المكان الصح قبل ان ترفع
وانتبهو من الحماس الزايد فوالله ما جاب فيني العيد الى الحماس الزايد

[DevDas]

الحمد لله على سلامتكم جميعا..........ومشكور يا مارشال على هالموضوع ...ومعليش يا شباب منتعلم من مصايبكم

[عبودي]

حمد لله على سلامة الجميع
والحمد لله انها اغلبها جات في الدباب ، الله يعطيكم العافيه

[سامبا]

تعيشوا وتحكوا عيالكم

والحمد لله جات سليمه ، حديييد في حدييد

[سامبا]

تااااااااااااابع
-
-
-
شباااب الحوادث التي اصابتكم ،السبب الرئيسي هو قيادة السائق او عيوب في الشوارع والدبابات

[nobody]

بالنسبة لي السبب الرئيسي هو إني ترددت وسوء الطريق كان له دور أيضاً

[ahmad1000]

وانا السبب الرئيسي هو جهلي بان الرصيف لابد من اخذه وجه لوجه

[BuSaLaM]

أهلين بالجميع ... أنا أخر موقف صار لي البارحة في رحيمة .. وقفت عند محل معجنات .. ترست بطني و لما جيت بمشي و على العادة كنت مقفل الدركسون ... و نسيت أفكه .. و لكم أن تتوقعوا ما حصل ... معي رديف بعد ... جيت أقوم الدباب ... مشى ... بغيت أعدل الدركسون .. بس ما يمدي ... إذا فات الفوت ما ينفع الصوت ... و أخذ لي تندة يمين ... بس الحمد لله .. ما صار لنا شي و الدباب بعد لأن فيه أرضيات للأرجل ... عملت بروتكشن للدباب كله و لا صار له ولا شي ...
العبرة
تأكد دائماُ إن الدركسون فري قبل تشغيل الدباب
حركه يمين يسار قبل ما تقومه
ما بيضرك شي
و سلامتكم من كل شر

[Mazen]

الحمد لله على سلامتك أبو سلام

بس شنو هو دبابك؟

[Camel-KSA]

مدري وشلون ابدا . انا الصراحه ما اعتبرها طيحه بس الراى لكم . المهم في يوم من الايام الخوالى كان الجو فيه نوع من البروده . فا تواعدنا انا و TNT في العماريه عشان نتمرن . المهم هو زي عادته تأخر على. فا انا صرت اروح وارجع , اروح وارجع . الزبده زهقت وانا احتريه, فا قلت يا ولد وقف عند المسجد اريح الى ما يجي tnt وتوي داخل المواقف عشان اوقف الزبده الدخله كانت يمين وطبعا حنا متعودين على ال يو تيرن دايم على اليسار بحكم الشوارع. الزبده ان ال يو تيرن كان يمين هذه المره يمين مع نزله خفيفه على نفس الجهه. اووووووووووووووووووووووووه وانا ما كنت مستعد لهذه الحركه المباغته الزبده فرامل امامي معي خلفي مع تو تيرن يمين مع نزله يمين يووووووووووووووه يووووووووووووووووه كثير اشياء في نفس الوقت مع قليل من التفكير طبعا السرعه كانت تقريبا 3 الى 4 كليو متر. يعني ولاشي . بدى الدباب يميل يمين حاولت اني اسوي شي وامسك الدباب بس على مين ! ! ! ! طب يا ولد وبس . طبيت ووقفت على رجولي وقعدت اطالع الدباب وهو منبطح على جنبه اليمين. بدون شعور لقيت حاط يديني لثنتين على خصري لووووووووووووووول والتفت واشوف tnt جاي بكل برود و الضحكه صوتها طالع من ورا الخوذه طبعا انا حملت مسؤوليه الحادث هذا ل TNT بس الحمد لله على السلامه ما صار فيني شي ولا الدباب ولا شي بس قهرني ببروده الزايد لووول .
شباب حاولوا انكم تتعلمون الدوران على الجهتين يمين ويسار. لانه من الممكن انك تضطر في اي مكان او زمان .

[r7eel]

يعطيك العافيه ياكابتن على الموضوع
والشباب انواع الحماس ... والحمدلله على سلامة الجميع
وعساعا يارب اخر الطيحات

[مشعل القويعي]

هذا حادث صغير ولكنه كان ممكن يكون هائل ولكن بفضل من الله كان بسيط وكان في عام 2002 تقريبا على دباب هوندا 900.

كنت في طريق الملك عبدالعزيز ( الخدمة ) بإتجاه الشمال وعند تقاطع الملك عبدالله إجباري إني أروح يمين لأني في الخدمة المهم خذت المنعطف وكنت على سرعة ضعيفة جدا لا أذكرها تماما بس أعتقد 25 او 20 وعلى الزاوية بالظبط فيه غطاء حديد الظاهر انه حق عداد موية او غطاء وانتم بكرامة بيارة وكانت ملساء جدا ولا انتبهت له إلا مؤخرا ولا يمديني أتفاداه لأن عيني كانت في المراية على واحد من الشباب الله يمسيه بالخير.
أخذت المنعطف ووطيت على هالحديدة مع فرامل أمامية خفيفة :wow: وحياتكم الدباب ما صدق خبر وعانق المزفلت .. زلق على الجهة اليمنى وزحف مسافة 3 متر تقريبا .

الإصابات :

كدمة خفيفة في الرسغ الأيمن لأني تركيت عليه مع الطيحة .

التلفيات :

- خدوش في الفيبر الأيمن من القناع
- ذراع الفرامل الخلفي مالت قليلا .

النصائح :

- كن حذر جدا في المنعطفات وراقب المنعطف من بعد .
- انتبه لكي لا تدعس على أي جسم وانت في زاوية المنعطف سواءا صلب أو لين .

[BuSaLaM]

الله يسلمك أخوي مازن ... الدباب
Honda VTX 1300
و حمدالله على سلامتكم جميع ... و بصراحة ... هالموضوع مفيد واجد ... و مشكلة إنك تطول النظر في المراية .... مشكلة عويصة .
سلام ؛

[biker to death]

السلام عليكم
اول شي الحمد لله على السلامة جميعا جميعا وانشااء الله انها ااكبر المصاايب .
سالفتي عيب اني اقوول عنه دباب بس بقوولكم وانشااء الله تستفيدون منها لانه دباب صغير سوزووكي سنفوور وسرعته 60 كم هههههههههههه <<<<<<<<<قال دباب ياعمي اطلع بس اطلع
قبل ست سنوات من يومي هذا كنا حنا ثلاثه راكبينه وتونا مضبطينه ومركبيله حركاات
وكنا بالسيد الثااني من الطريق وشطفناواحد على نفس دبابانا الراكبينه وما ادري لقاافه غلط علينا راعي الدبااب وحنا ماقلنا على الله واحد تلقف <<<<<<<<مسوين اقوياء :o المهم اخذنا فوق تحت ولحقناه ومن الحرقه والكلام الي قاله لنا دفسه برجليه والى حنا نسبح فووووق الزفلت وقمنا نتطاير والدباب فوق رجلينا طبعا طحنا على الجهه اليسرى :motz:
الأصابات :
السواق افخاذه الثنتين تقشطوووا .
الراكب الثااني حرق برجله خفيف من الشكمان
اما انا الله لايوريكم ورا اصعااابي صاااار بحيرة دم مع تقشط الجلد وبعض اللحم راح
وركبتي رض مع جرووووح متفرقه في ركبتي طبعا
أضرااا ر الدباب <<<<<<<<اي دبااب كله تالي دبااب :
الاصطبات تكسراَ
وتقشيطات في الصبغه
وشكرا حباايب قلبي وكل واحد يتعلم من طيحه خويه ::saudi::

[ToO cRaZy]

انا صارلي حاااااادث ماله داعي بس المكتوب دايما بيجيك
كنت توني صاحي من النوم مواعد واحد من الشباب على اساس اني اطلع معه بالسيارة يعني طلعة محترمين ...
الا و شوي قلت يا ولد خذ الدباب واطلع هبل بالناس ........ اخذت الدباب و طلعت من البيت ..... ماشي حالي حال نفسي لا اذي احد ولا استهبل على احد
بعد 500 متر من البيت كنت ماشي تقريبا 120 و الشارع اللي جنب البيت ما فيه رصيف يفصل الخدمة عن الرئيسي ......
اشووف فان واقف بنتظرني امر ..... شوي لمن قربت الاقيه تحرك ووقف ي نص الشارع يبغى يسوي يو تيرن و كان في يارة قدامه ......
وانا ماشي ارتبكت و ما عرفت ايش اسوي ..... ظغت فرامل امامية ...لقيت نفسي داخل فيه بسرعة ... زودت الفرامل و لفيت يمين ....... انسدح الدباب على الجانب اليمين و انا صرت اتقلب قدامه و يلاحقني ......
شوي ضرب راسي في صدام السيارة اللي ورا و نزلت تحتها و شوي اسمع صوت ضربة قوية في السيارة .......
طلع الدباب ضرب في السيارة من الجهة الي انا ضربت فيها و شوي قمت من تحت السيارة ادور على السواق
اول شي سويته لمن نزل السواق فسخت الخوذة و رميتها على وجهه و طاح و ما قام ...... و فكيت جولة فوقه

المهم فكونا جماعة الخير و دفيت الدباب الين البيت ..........
الاصابات :
جروح سطحية في كل محل بجسمي لاني تسحبت في الشارع حوالي 15 متر
التلفيات :
فيابر الجنب اليمين تكسرت و دعسة البنزين و ملحقاتها
النصائح :
لا تحاول وانت مسرع تضرب فرامل امامية ابدا
انا الحمدلله كنت لابس الخوذة بس ما كنت لابس جاكيت ولا جوتي زي الناس

[فـــ@ـــد]

الحمدلله على سلامتك
الله لطف عليك
لولا الله ثم الخوذه لكان راح راسك شكشوكه
:) :hi: :rolleyes:

[أبوحمد]

انا صار لي حادق غريب كان في 15 رمضان اللي راح على سوزوكي 1000 2006 غيرت الزيت والفلتر وكنت ما خذ الدباب بوديه يوم عطيت الدباب بور فجاءه انفجر فلتر الزيت سبب في تغيير مسار الدباااااب وانقلب وطحت معاااه وبديت اقلب انا جها والدباب من جها .
الاصابات
1. كسر مضاعف في الرسغ في الايد اليسرى.
2.كدمه في الركبه اليسرى.
3. تزلغ في الجلد.
التلفيات
1. كسر في القناع.
2. غطى الماقنيت
3.تغيير فيابر الدباب اليسرى.
النصائح
كن حذرا عند تغيير الزيت لا تركب فلتر الوكاله بل ركب رياضي وارفع الدباب على ستاند وجربه قبل ما تطلع عليه.

[فـــ@ـــد]

الحمدلله على سلاامتك
:) :)

[ذيبة قطر]

طبعاً ياشباب انا بنت مالي دراجه...
والحمد لله اخواني واحد منهم باع الدراجه من تزوج والثاني لله الحمد يحاسب..

بس من كمن شهر صار حادث اليم لواحد من الشباب الله يهون عليه ويصبره...والشي وايد عوور قلبي وحبيت انقله لكم للعبره...

اسمه فيصل راشد المري..

كان جاي مسرع من تحت جسر الجوازات..

واظن من اللي سمعته ان سياره لفت عليه..وتشدخ على الجار...وسحبته الدراجه ليييييين الحديده اللي في الشارع...

الاصابات:
انقطعت ذراعه اليمين..وعوار في عموده الفقري..

التلفيات:
انكسر الواجه الامامي كللللللله
بالعربي الدراجه تكنسلت خير شر...

النصيحه بنظري انا:
خففو السرعه ياشباب وانتو نازلين تحت الجسر..

والله يحفظنا وياكم شر الحوادث..ويبعدها عنا وعنكم واعن اقرب الناس لكم من اهاليكم لربيعكم..

وسلامات للشباب ماتشوفون شر ان شا الله ...

ومشكووووووووور اخوي ويعطيك الف الف الف الف الف الف عافيه وماقصرت في اتعابك الواضحه خيوووو..

وبإنتظار جديدك داااااااااايماً يالغالي

اختك ذيبة قطر..

[فـــ@ـــد]

الله يصبره :(
صحيح وكانت دراجته هايبوزا :confused:
والله اعلم

[roree]

الحمدلله على سلااااااااااااااااااامتكم والله :) :)
l s b

[let_me_live]

ياشباب اما انا بغيت اكهر الدبابات مره لاني قبل لا اظلع الدباب صرت زي الي كرهتو ليش مادري؟؟!!...
المهم انا طلعت البايك من الوكالة سوزوكي دوبني ملطعه مبسووووط فيه المهم كان ملمع من الى حتى الكفرات
(اعزكم الله) طيب نزلت الدباب من النزله حقتهم الي يعرفو الوكلة يعرفو النزله حقتها اكيد الحمدلله الى الان كل شي تمام
مامداااني امشي 20 متر يمكن من الوكاله للاشاره جيت بلف يمين الى تزحلق علي الدباب وتخيلو كم كانت السرعه
طبعا محد راح يتوقع اكيد الكل راح يقول مسرع؟؟ طبعا لا كنت ماشي 20كيلومتر يعني ولا شي بس للاسف المزفلت كان ناعم
وفوق كذا الكفرات ملمعه يعني انواع الزلق في الطريق...طاح الدباب رفعتوا ووقفت على جنب الحمدلله ماجا اضرار للدباب الى شي بسيط مخووش في البدي بس.. العظه من القصه لاتمشي بالدباب والكفراات ملمعه ابدا
ومسحه ياشيخ لو بخرق ناشفه بس لاتمشي وهو ملمع
وسلالالالالامتكم وماتشوفوا شر ان شاءالله
تحياااتي

[YAZ_R6]

السالفه طيحتين ظريفات
الأولى لا خساير ولا تلفيات خدش بسيط في الخوذه مع طيحت وجه وفشيله كبيره
الموقع اشارت تقاطع الملك عبدالله مع الملك عبدالعزيز الوجهه طريق الملك فهد كنت في طيق الخدمه واقف اكلم 1 مواعده حاط الخوذه على التانكي مر خويي ومانتبه لي لحقت وراه بسرعه بدون خوذه الأشاره كانت قريبه والنيه اني بلبسها عند الأشاره المهم مع زحمت السيارات العصر لقيت نسي ماسك اليمين مره بين السيارات والرصيف وصلت قدام بحط رجولي على الأرض حسب حسابي الرصيف يمين بحط رجلي عليه اراد الله وجت الحسبه غلط وزلقت رجلي اليمين بين الدباب والرصيف والتوت وهبا الدباب طاح عاليمين ورجلي انحجرت بين الرصيف والدباب والخوذه تتدحرج على طريق الخدمه والعالم انواع الفلراملات يوخرون عنها وانا ابطلع رجلي بحاول ارفع الدباب انسى ابحل يا ولد المهم الله يجزاه خير خويي بعد ما مات علي ضحك جا يساعدني والتفت العالم شغالين ضحك و مدري والله اذا حصل تصوير او لا بس الله يستر المهم رفعنا الدباب جبت الخوذه ولبستها اول ماشلتها ابوزي خشتي بس عقب ايش ياشاطر.
الثاني بحوش بيتنا الي منكم دخل بيتنا ويعرف الممشى اللي نستعمله عشان ندخل الدباب ورى صغير والحديقه يمين اوطى بتقريبا نص متر المهم زي منتو عارفين مسوي متعود عليه والأبواب عندنا مسكره والسور عالي فماعندنا قطاوه في البيت المهم داخل متأخرذيك الليله ومهدي مادريت اللى ذاك الشي اللي طلع علي من اليسار قطو انتهت متأخر فرامل مع لفه يمين بسيطه بحط رجلي اليمين ما فيه ارض صار اللي صار الدباب صار جالس على اليد والتانكي 180 درجه الى- شوي المهم حاولت ارفعه ما قدرت دورت احد صاحي يساعدني مالقيت دخلت غرفتي ونمت وقلت الصباح رباح المهم الساعه 6 الصباح باب الغرفه ينطق وانزل القى السواق يستناني يناظر في الدباب ورشاشات المويه حقت الحوش شغاله وغسيل للدباب طبعا مرايه وخش في الفيبر


الحلقه الجايه نتكلم عن طيحات اخطر شوي اتمنى تتسلون عليها وعل فكره القطو حق السالفه الثانيه اخذت حقي منه

[nobody]

انت مشكلتك تختفي وتجينا بقصة حادث لا حول ولا قوة إلا بالله

[GH]

السلام عليكم انا كنت ادرس بسوريا كانت معي ياماها قدييييمه حجم 7ونص بمكينة 1000 يمكن موديب 82 اللمهم البايك ثقيل واانا كنت مسرع يمكن 120 ويطلعلي كلب والله انا والبايك طايرين طحنا المهم من الخوف شلت الدباب وهربة لما وصلت البيت الواجه مكسره والفيبرالايسر والكلتش ونا شويه شموخ

[اباتشــــــي]

بدون اي مقدمات
.......... كنت بفقع كورة بالدباب ...........
وكان اختياري هو الحل الصعب
جت الكورة في نص الشارع وبشكل سريع ومفاجئ
لا تقعد تقول بريك او انعطف ولاا انعفط
مالي الا اني اصدم الكورة وتعدي جراء الأصددام او ارقى فوقها و افقعها (عدم المؤاخذة على التعبير , هذا هو الوصف الدقيق) المهم
بعد ما وصلت للكورة تفاجئت ان الكور ما بعدت بعد ماصدمتها
الا بالعكس صار الكفر الأمامي فوق الكورة
وبعد ذلك اكتشفت اني امتطي فرس فازع
جلست اعد لحد العشرة عبال ما اعانق المزفلت
الأضرار
جرح بليغ في اعلى الكتف الأيمن والحمدلله ماوصل لحد الكسر
جرح سطحي في الساعد الأيمن
جرح بليغ في منطقة العقب من القدم اليمن

نصيحة
إذا كان الشارع فاضي لاتنسى الن الرصيف مليان


ملاحظة
كنت اطلع بالبايك من دون هلمت
لكن قلت خليني اجرب الهلمت اليوم وربك ستر ما صار الحادث الا بعد ما لبس الهلمت بالصدفة وكان السقوط في من جهة الرأس مباشرة قبل بقيت الأطراف يعني تخيل ثقلك كله على الرأس

انتبهـــــــــــــــوا يا شبـــــــــــــــــاب

[THE PROFESSOR]

خوفتوني بروووووح ابيع الدباب

انا توني اسوق ولا طيحه بس استنى الطيحه بفارغ الصبر

[eyad]

سلام للجميع ...

طيحتي للأسف سخيفه سخافة جو الرياض :( بس الحمد لله على كل حال , يا طويلين العمر راجع للبيت ثالث ايام العيد ابي اجهز شنطتي عشان ناوي اطلع لشرم الشيخ فمنيب متأكد وش اللي صار بس المهم اني حول البيت وماشي الحالي ومهدي واهوجس فالشارع فيه مطابات فبدل ما امشي فوق المطاب كنت امشي في المجرى اللي بينهم المهم وفجأه وبدون مقدمات الدباب جا تحتي وعلى جنبه الايسر وانا طبعا لحقته على الازفلت وعلى جنبي الايسر السبب اني راخي يديني واهوجس ومسرح ومستعجل ابي ارجع اجهز شنطتي عشان السفر وانا مار بين المطاب في المجرى كان فيه ازفلت طالع بارز شوي وما انتبهت له فأفقدني توازني وطحت وصار اللي صار والحمد لله على كل حال الخوذه جتها حكوك الحمد لله اني لابسها وللأسف ما كنت لابس لا جاكيت ولا اي نوع من انواع الحمايه .

اصاباتي :
جروح خفيفه في يدي اليسار
اربع غرز في الكوع اليسار
كنسلت شرم وتحولت السفره الى الاردن :(

اصابات الدباب :
الحمد لله ما جاه شي لاني مهدي ومركب سلايدرات فالطيحه كانت على السلايدر . الشي الكايد اللي صار من الجهه اليسار الغطا اللي يغطي الزيت بداخل المكينه انشق وغيرته وما كلف شي يسوا الحمد لله على كل حال .


نصيحه : البس اللي تقدر انك تلبسه ( خوذه جاكيت بنطلون قفازات بوت ) والله ما تسوى عليك طيحه تضيق صدرك وتبعص مخك . ومهما دفعت فيهم تبقى صحتك وسلامتك اغلى منهم ؟

[nyooooof]

يمه شكلي بهون اشتري دباب << خاف من سوالفكم :p

لا جد والله يعني كل من شرا دباب لازم يذوق طعم الازفلت يؤ يؤ :(

الله يصبركم بس :D

بس صراحة الموضوع حلو حسيت انه تيته تقرا علينا قصص :D

..

[abuhamzah]

السلام عليكم
بارك الله فيكم في النصايح بس صراحه ما اعجبني منها الا القليل
الخوذه والجاكيت والملابس الوقائيه اتوماتيك ولكن معظم الحوادث ناتجه من اغلاط شخصيه وقله احترام خطوره الدراجات. انا عايش في امريكا لي فوق العشرين سنه ومنها كم سنه متقطعه عندي دراجه ناريه واخرها هوندا
Cbr 600
واحب سواقه الدراجه في يوم صحو مع شله من الشباب. انا عمري الان 43 ولا زلت اسوق الدباب. المهم من هذا الخبره اني احب اقول انه لازلت اخاف من الدباب كخوفي منه اول سنه. والحمد لله من اجل هذا الخوف ما حصلي حادث الي الان الا اشياء طفيفيه ناتجه عن لحظات نسيت اني فوق دباب. والحمد لله ان الله سلم.
المهم الي خلاني اجي في المنتدي اني راجع للسعوديه هذا الصيف للعمل والعوده للوطن وكنت اود اعرف اذا اقدر اسوق دبابي في البلد والا لا وكنت حافتح موضوع جديد ولكن كتب الله انه يكون هنا.
اصحاب السيارات ما يحترمو بعضهم البعض فكيف يحترمونا احنا سواقين الدبابت والا لا ؟ بالله صححوني

انا مش شباب زي اول بس اني لازلت احافظ علي صحتي ورياضتي بس التفكير شوي مش زي الشباب وما عندي الجراه زي اول وحبيت اعرف منكم هل اجيب دبابي واسوقه في السعوديه والا اخليه هنا ؟
كمان ابغي اعرف فين تتجمعون وهل تسون رحلات مع بعضكم البعض؟

أخوكم محمد

[مشعل القويعي]

عزيزي وأخي الكبير محمد ..

أول شي أشكرك على إختيار منتدانا ومنتداك لطرح هذا السؤال وإن شاء الله راح نكون عند حسن ظنك .

بلدك لسة بخير يا ابوحمزة والشباب هنا محتاجين أمثالك من الرجال لتطوير هذه الرياضة . بل العديد منهم يعتمد على العقليات شرواك .

لا أحب أن أطيل عليك وخاصة في هذا الموضوع بما إنه موضوع يخص الحوادث .

وحياك الله والكل هنا مستعدين إنهم يجاوبوا على أي إستفسار في أي منتدى من منتديات سعودي بايكرز .

[Mohammed_ZX600r]

البلا يا شباااب لو واحدن تبلاك وانت على الدباب زي ما صار لي


طالع في حالي وشاني وامشي على رواق شوي الا طلع واحد من الحاره يبي يدخل الشارع اللي انا امشي عليه المهم انا انتبهت له وهديت عشان يطلع قدامي فقام الاخ وقف عشان امر انا يوم مريت طبعا زدت من سرعتي يوم وصلت له الا الخ كنسل وقال يا عمي هذا اللي ناقص اوقف لدباب ما دريت الا جنب سيارته كله صاقعني وطير ني انا والدباب وفوق كذا كمل مشواره ابد ما صقع ادمي صقع قطو وانحاش


الاصابات

رضوض في الجهه اليمنا من الجسم كامل واقوا شي عورني هو الكتف لاني طحت عليه مخوش في الساق ومن كفر السياره مع العلم اني لابس خوذه وجاكيت وقفازات


اصابات الدباب

الفيابر الجانبيه طبعا اليمين مخوش واليسار كسور لان الدباب طاح على الرصيف التانكي تعفط من الجهتين عصى الفرامل الخلفيه انكسرت مع كسر خفيف في الوجهه


الحمدلله على كل حاااااااااال ومهما حاولت تطلع وانت منتبه ولابس كل عدتك بيجيك ابن حرام اللي بيتبلاك

[عاشق ياماها]

الف شكر على الموضوع الحلو


اما انا كنت رافع الدباب طبعن بانشي


كان بنمرت 6 وكنت واقف على الحديده الي وراء وكان الدباب محتمي

يعني درجت حرارته مرتفعه

وبعدين عضت مكينته وانا رافع على سرعه

وإذا جيمت المكينه والدباب مغزل

مسكن الكفرات الي ورا وبعدين طحت انا قدام الدباب

مااااااااادري وشلون جيت المهم

رجل على الهدرز وانا تحت الدباب مااااااااادري وشلون



الاصابات


جروح بسيطه الحمد الله


التلفيات


توضيب مكينه


النصائح


لبس والواقي والهلمت


تبريد الدباب اول باول

دمتم بود

[F A H A D]

الحمد لله على السلامه والله يعوضك خير ان شالله

[shb_2005]

السلام عليكم انا توني لي ٣ ايام مطلع gixxer 600 اول يوم خذيته الف فيه في الحي عشان اتدرب يوم اطلع الرخصة والحمدالله كان مررة الوضع جيد جيت اليوم الثاني ولعت لمبة البنزين قلة خليني اروح المحطة اللي جنب البيت عشان اعبي وعبيت ُُفل ب٥ ريال طبعا مبسوط السياة اقل شي ١٥ وهذا نص التانكي فضى المهم بس يوم اشغل الدباب امشي واب اخذ مديور يمين وانا يمكن كنت ماشي ٦ ولا ٤ ويمين وبس فجاءة اختلف التوازن ومثل الشطار ومن زود الرواقة طفيت الدباب بالسيفتي ب،تون قبل ما اطيح وعلى طول رفعته وشغلته ومشيت الاصبات:ضحك مفرط داخل القلب :p وفشيلة
الدباب:ما جاه شي غير حكة بسيطة في الكزوز والكراش كيج اكل كل شي بس
بس صار شي زيب معي ان بعد ما شغلت الدباب وماسك الكلتش الدباب يبي يمشي لحاله وهو على الN بس سيارتة ومشيته بعدين يوم وصلت البيت صار طبيعي :)
والله يستر من القادم بس اددعولي ولكل البايكرز بالسلامة وان الله يحفظهم
وشكرا يا اخلع منتدى بايك ;)

[abc123]

موضوع جبّار لأبعد حد

[abc123]

بدبابي الجديد بيول Buell 1125R
كنت توني مطلعة من وكاله هارلي ديفيدسون (طريق الدمام-الخبر الكباري) و مجهز أموري على أن وجهتي تكون الجبيل.
المهم و أنا ماشي في أمان الله و قبل ما أوصل الكبري اللي عند سكيكو و أسمع صوت شي يحك في الكفر الأمامي تقول كأنة ستيكر او ملصق متعلق بالكفر و هذا الصوت ما يطلع إلا إذا لفيت أو ميلت يسار.
فقررت أني أدخل المخطط اللي ورا جريدة اليوم جهة التعاونية للتأمين(تعويض السيارات) و قلت أتفحص دراجتي الجديدة, المهم و لازال الصوت يطلع لما ألف يسار و كنت أمشي تقريبا3كيلو/ساعة المهم و فجأة بدأ الصوت يتلاشى فأنقهرت:motz: و قلت الا أعرف وش السالفة.

المهم و لفيت يسار قوي مع فرامل أمامي علشان أتأكد أن الصوت موجود فما وعيت إلا الدباب بين رجليني منسدح على جنبة الأيسر لكن الحمد لله أني ماسكه من الطارة(الدركسون) باليد اليسرى فلم يحصل تلامس مع المزفلت.



و أنا الحين توهقت و صرت متعلق انا و دبابي اللي لاهو اللي طاح و لا اللي خلاني أعدلة!
فلو فكيتة راح يطيح على الزفلت و أن بغيت أرفعه فما راح أقدر؟!!!!
فقلت أسوي ذكي:umm:و أحط يدي اليمنى على الشكمان من تحت عند المكينة في الجهة اليمنى علشان أثبته من اليمين و أرفع الدباب من اليسار بيدي اليسرى اللي ماسكة بالدركسون فما وعيت الا بصوت تسسسسس (صوت جلد القفاز الأيمن و هو يذوب على الشكمان):(و أشيل يدي عن الشكمان و تبقى يدي اليسرى مناضلة و مصممه على إبقاء الدباب بعيداً عن ذلك العدو اللدود (المزفلت).

و بالقرب منّي (30متر تقريبا)و إذا بذلك الهندي مدري البنغالي اللي يناظرني و ينتظر ايش راح أسوي لأنه مو مستوعب الانبطاح الغريب اللي صار و الظاهر انه يحسبني متعمد أبي أسدحه و انزل أشرب من البرّادة اللي عند باب المستودع اللي بجانبي (على باله سيكل) فَلَوّحْت بيميني الكريمة(و الدخان يتصاعد من القفاز المحترق) منادياً هذا الرجل الذي أكلني بعينيه المتلألئتين طالباً منه يد العون و المساعدة:help:فَفَزّ كما يفز الذئب على فريسته و أخذ يرفع معي دراجتي حتى استقامت على كفريها:yaa:فسَمّيت بالله و توكلت على الله و اعتصمت بالله و أتجهت إلى وجهتي و وصلت بحفظ الله و كل هذا علشان اللصقة اللي كانت على الكفر.

الإصابات:

الحمد لله لايوجد أي شي سوى أن عضلات الكتف و الساعد و الذراع و الفخذ و الساق(طبعاً كلها اليسار) تأثرت لمدة خمس أيام تقريباً و ذلك بسبب الإجهاد و الضغط اللي صار عليهم.




التلفيات:<O:p

لا يوجد و الحمد لله الذي ساعدني و أعانني على تحمل وزن الدباب حتى لا يلامس المزفلت.


النصائح:
إذا بتفحص دبابك, فمن الأفضل أن يكون واقفا تماماً على الأرض أو مثبت على ستاند خاص لهذي الأمور.

وأعتذر عن الإطاله و تذكرو دائماً (الزفلت = عدو البايكريه رقم1)<O:p

</O:p

[فهد الحصين]

يعطيك الف عافية اخوي مشعل والحمد لله على السلامة
وتقبل مروري

[mafia32]

اولا احب اقول لكم ان تاريخي مع الدراجات بدأ منذ سنة ونصف. ورغم ذلك تعرضت لثلاثة حوادث حتي اضطرت لتغيير الدراجة من كثر ما ارتطمت بالأرض. ساحكي لكم اخطرهم. كنت قادم من من منطقة بعيدة حوالي ثلاثين كيلو من منزلي وكان الوقت متأخر والشوارع فارغة مما اغراني بزيادة السرعه واثناء سيري فجأة ظهرت سيارة ودخلت الشارع الرئيسي وكنت لا زلت بعيد عنها فقررت ان اتخطاها علي يسارها ولكنها فجأة انحرفت الي اليسار فضغطت علي الفرامل الخلفية مع انحراف المقود يسارا فانزلقت انا والدراجة نحو السيارة وارتطمنا بها.
الاصابات
جروح وكدمات ف جميع اجزاء جسمي وقد كنت محظوطا ان لم يرتطم رأسي بالاسفلت لاني لم اكن ارتدي الخوذة يومها
التلفيات
كسر كلتش
كسر محول سرعات
النصائح:
لا تأمنن الشارع وخلوه فقد يظهر لك احمق من حيث لا تدري.
لا تسرع داخل الحواري بل اختار الطرق السريعة لذلك

[حايلي وافتخر]

انا الله يسلمكم ماذقت طعام الازفلت بس ذقت طعم البلاط كان ياما كان في قديم الزمان <<اخلص خخخخخخخخخخالمهم هذا في بيتنا وكانو عندنا خوالي وولد خالي تحداني اني اخمس ورجلي على الصدام ترا انا كمخه والا اطلح بزر مادخل الابتدائي او هو باولى المهم اني ثور << ايه عادي من زمانالمهم فريت الفرة الاولى والثانيه والثالثه السابعه ووقتها مدري وش صار طحت على ورا وتشقلبت على على الدباب ثمن ضربت الارض وطحت من جهة الكفر يعني من الستاند مني مستوعب وشلون صارت الدباب 4 ويل وما كنت لابس سيفتي ولا هلمت ولا حاجه الاصابات :انقهرررت وبغيت اذبحه بس ما اقدر الغلط غلطي ليش اطيعه التلفيات :الحمدلله ولا شئالنصائح :لا تطيع بزروتقنن قدام الجمهور الكريم

[Baker]

عزيزي fahoode88 (http://www.saudibikers.net/vb/member.php?u=2287)
حذفت ردك لانه لايخص الموضوع ارجو مراسلة مشعل على الخاص اذا حبيت تستفسر

[بندر العنزي]

اول شي الحمدلله على سلامة الجميع وع قولة جدتي < راحت غلطه بستلم شدها بالمنتدى :) بالحديد ولا بالعبيد

انا طيحتي غبيه شوي بس ماعليه توني على عالم الدراجات بقراطيسي

تقريبا قبل اربع ايام
انا متعود اترك الدباب بالكراج والجير بالفاضي
وعندي اخوان وعيال عم قرود الله يصلحهم
انا متعود اركب ادق سلف على طول :) بدون كلتش ضامن ان الدباب بالنمره الفاضي
جيتك انا بكل ثقه اكلم ولد عمي ركبت حطيت المفتاح واكمل كلامي يوم دقيته سلف وانا مرتخي نقز الدباب :( وطاح على جنبه الايسر
الاصابات : الحمدلله طلعت بدون اصابات
تلفيات بالدباب : خدش بسيط بالفيبر من الجهه اليسر
النصيحه : لاتشغل الدباب الا وانت ضاغط كلتش
الانتباه لوضعية الجير قبل التشغيل
لاترخي جسمك وقت التشغيل توقع اي مفاجئه من الدباب

[يزيد]

مشكور ومتشوف شر انا الحمد لللة مامعي دراجة بس بشتري قريبا

[حمودي 1]

الله يحفظكم كلكم بلاا استثناء

[ALFARIS-ALHARB]

الحمد لله على سلامتكم

وقصص تخوف الصراحة

واللي خوفني اكثر اللي انقطعت يده الله يصبره انشاء الله

ومشكووووورين على النصائح

والله يحفظ كل مسلم

[Rossi46]

انا حادثي 100% غلطتي كنت راجع من الدرعيه اخر الليل وقررت امسك خط مختصر يوصلني لطريق الملك فهد, طبعن الطريق ظلام و اول مرة امسكة <<<< غبي

طريق عبارة عن خط عريض غير مخطط مظلم وفيه تقريبن دوارين، المهم انا ماشي في امان الله وفهيت شوي الا الشارع قلب طلعه وانا مكمل على دزتي امشي في حدود الميه وفجاة يقلب الشارع نزلة.... وهنا المفاجاة......... دوااااااار :nejomcom090: اول مره احس بشعور شباب الموتو جي بي بدون فرامل ولا شي فكيت البنزين واسدح الدباب يمين.... الا والله ابو الشباب مستمر سيدا طبعن كل هذا انا ما ادري انا وين رايح الطريق ظلام وانوار الدباب صارت متجه اتجهات مالها اي صلة بالمكان الي انا متجهلة:nejomcom036: المهم وادعسله الا رجع اعتدل واكتشفت اني موجه الا ارض فيها كل انواع صخور الي مقررة على شباب الثانوي العلمي في مادة الجلوجيه...... هنا قررت اتقمص ولد الموتو جي بي مرة ثانية بس هل مرة يسار معى بريك خلفي عشان اخذ الطيحة زحف .... كان كل طموحي اني ما ادخل ذيك الارض ..... وفعلا اخذت الطيحه بحتراف زحفا زحفا....

الاصابات:-

-خدوش في الركبتين والساقين
-صداع لمدة يومين من ضربة الراس في الارض
-شد في الرقبة لمدة يومين

الاضرار المادية:-

-طفى الدباب
- مالت الشوكة
- انكسرت الاشارة اليسار
-كمية غريبة من الحجر الجيري:nejomcom090: دخلت خلف الفيابر

الاعتبارات:-
- لاتدخل في شارع مظلم ما تعرفه :nejomcom036:

[aboode al naif]

أعجبني صرآحه الموضوع والحمد لله على سلآمة الجميع

خل اخبركم بحادثي واللي توي عرضت دبابي بالموقع قبل شهرين وهوا مصدوم

المهم انا والشباب متعودين نطلع بطريق دايري بالطايف نتسابق ونقاوم طريق حلو وسريع وماحولك احد

المهم طلعت وقلت امر على استاد ملعب عندنا وفيه مخططات وفيه طريق حلو حق مقاومات قبل لااروح الشباب الا احصل راعي كابريس اقاومه وهناك طبعا عندنا مو متقبلين فكرت انو الدباب اسرع من السياره يعني بالقوه يسبقك اخذت معاه شوط ههههههه ومافيه امل انه يسبق البايك على اس اس اتحايل فيني ارجع من اول واسابقه مره ثانيه المهم العفويين اتجمعو بالشارع وانبهرو سطايح اول مره يشوفو دباب
وصوت m4 يطربهم ههههههه قومة الدباب وبمنتصف الطريق فيه تقاطع ممكن امشي بحدود 180 لسى قومه الا ووواحد شايف الناس متجمعين مايدري وش عندهم ويبي يشوف ومغطين عليه الا السياره اشوفها تطلع بوجه الدباب وانا خلاص قريب منه انا همي كله السياره اللي خلفي لانو بيدعسني مافيها كلام
ضربت فراامل اماااامي اللين ماحسيت ان الدباب ارتفع من خلف بقوووه خياليه وارتبكت مرررررررره وطرت من عليه وهوا جلس يتقلب خلفي اللين ماعدا من جنبي وانا اتدحرج بالشارع وضرب بالسياره الا وراعي الكابريس انواع الفرامل عنده ويضرب السياره بعد الحمد لله انا كنت لابس خوذه وضرب راسي بالرصيف بدون جاكيت بس ربي ستر وجات على كذا

الاصابات
ضربات ووكدمات بكامل الجسم
يديني من الزحلقه انواع الجروح السطحيه
والركب نفس الطريقه جروح سطحيه


الاضرار
الشاص
المساعدات
جنط امامي
فيابر
عمود التوازن
الواجهه الاماميه

صراحه سسالفة اني اسويه شلتها من راسي لأنه مكلف
الحمد لله بعته واشتريت واحد افضل منه

[Malek]

الحمدلله على سلامتكم شباب,, مواقف راح يستفيد منها جميع الاعضاء.

المهم سلامتك والحديد راح تعوض بغير.

دمتم بخير

[سهم الخواطر]

الحمدلله على سلامتكم ياشباب وماتشوفون شر ان شاء الله ..
أنا بحكيكم عن طيحتي ..
الحمدلله الله قدر عليا واشتريت دباب سزوكي 2009 مقاس 600
وانا اول مره بحياتي أسوق ..
المهم صرت اطلع كل يوم في مخطط فاضي .. ماحولي أحد اتعلم براحتي ..
وتعلمت السواقه وكل شي تمام ..
وفي يوم من الايام حسيت نفسي اوكيه ومتمكن من الدباب وكل شي تمام
المهم قلت يله خلني اطلع بدون لبس حمايه >>> على بالي فنان ..
طلعت اخذت اول لفه وكل شي تمام .. لكني حسيت الجو برد >>> وافكر بيني وبين نفسي واقول يله خلني ارجع والبس واكمل لفله ..
المهم لبست الخوذه والكسارات حق الركب والجاكيت والقلفز والحمدلله كل شي اوكيه ..
قعدت الفلف شوي الا ويجيني واحد ويلاحقني ويأشر لي وخلاني أرتبك .. يعني توني جديد ع السواقه وكدا .. وهذا ناشب لي ..

المهم المخطط الي كنت اسوق فيه توه جديد وبين السكتين فيه تراب لسا ماحطوا الرصيف ..
قلت يله خلني اشرد منه وانزل بالتراب واختصر الطريق ..
انا نزلت في التراب وعينك ماتشوف الا النور ..
ويجي الدباب على خشته .. مع اني والله كنت اسوق بشويش وعشان النزله هديت كثير
لكن والله اني احسها من عينه عساها البط .. عين ماصلت ع النبي .. أول مره بحياته يشوف دباب ..

الاظرار ..

انكسر عندي الفيبر الصغير اليسار الي فوق الهوايه .. بس
الحمدلله باقي الدباب ماجاه ولا شي .. لاني مركب كراش كيج
وانا الحمدلله سليم بحماية الله وثم اللبس ..

[Malek]

الحمدلله على سلامتك أخوي وأن شاءالله ما تشوف مكروه في حياتك

لاحد يتساهل في لبس السلامة مهم للغاية يا بايكرز

[c0pr]

اكلت من الطيحات لين قلت امين

طبعا المشهور بين الطيحات انو الصباح رحت لوكالة هوندا وانا راجع المشكله لاني مسرع مره ولا مهدي مره امشي حدود ال 80 وماسك الخط اللي بالوسط يعني لايمين ولا يسار بالنص < مسالم > المهم جاني واحد شكله يمشي 160 هذا اقل تقدر وشال الدباب من ورى شكله سكران او بالعمد ؛ الله اعلم المهم اول ضربه جاتني من الدباب على الساق اليسار والله لايوريك انواع الشقلبات ع الزفلت على ظهري على الجنب الحمد لله اليوم الوحيد اللي لابس السفتي كامل الخوذه ، والله مدري وش كثر المسافه اللي انسحبت فيها ع الزفلت بس اني طولت وانا اتشقلب طفشت بحط رجولي ولا يديني ع الزفلت واوقف هالزحلطه المهم وقفت وانا منسدح على ظهري بوسط الشارع يديني جروح اترك يديني رجلي ذبحتني بالوجع يديني تزلطت الحمد لله الشارع ماكان فيه إلا سيارات قليل ولا رحت خبر كان /اللي صدمني هرب على طول اصلا باين عليه ماكان يبي يوقف من اول / جوني ناس واتصلو ع الهلال الأحمر وسعفوني ،جزاهم الله خير، وشهرين ونص وانا يالله يالله.. وللأن ماعرفت مين اللي صدمني...


نصيحه: اذا طلعت بالبايك اعتبر ان كل الشارع غشمان او مجانين في اقل حاله.

ثانيا:لاتسير خلف اي سياره حاول تكون يمينا او يسار منها ممكن توقف فجئه واحترص من الي بيلفو يمين او يسار وحاول تكون سرعتك بالمدينه متوسطه.

ثالثا:لاتخرج بالبايك إلا وانت لابس السفتي كامل ولو ان الجو نار.

ثالثا: اغلب اصحاب السيارات خاصتن الرياضيه منها مايعترفو ان الدباب يسبق السياره يعني سابقك سابقك ؛؛ حاول تكون خارج المدينه ولااوصيك لما يقفل العداد :nejomcom046:


والأهم من هذا كله ودائما ننساه ولا نتذكره إلا بعد فوات الأوان إلا وهو " الأذكار تنفث على نفسك وتقرأ المعوذات ثلاث مرات واية الكرسي" لانك ماتدري تحصل بالشارع المعيون (فيه عين) وتحصل المجنون وتحصل السكران ،، ومعروف ان البايك لافت للأنظار يعني لاتأمن على نفسك إلا بالأذكار واحد يشوفك مايذكر الله سواء ع لبسك او على البايك او لونه..

رابعا: اشكر من وضع هذا الموضوع وكل من شارك فيه

اخوكم ماجد